GIKONDO NA KABUGA MU MUBANO WIHARIYE

Paroisse Gikondo

Sangiza inkuru

Paruwasi ya Gikondo ni paruwasi ikunze kubana cyane n’izindi paruwasi. Mu nshingano z’ibanze komisiyo y’umubano  ifite muri iyi paruwasi harimo iyo kwagura amarembo no kubana n’izindi paruwasi. Kuva umwaka ushinze paruwasi ya Gikondo yihaye ibinyujije muri iyi komisiyo y’umubano, hihaye inshingano yo kugirana umubano wihariye an paruwasi zose z’abapalotini uko ari esheshatu, muriaka karere u Rwanda ruherereyemo: izo paruwasi ni Kabuga, Ruhango, Kinoni zo mu Rwanda  na paruwasi ya  Karhale  na Rutshuru  zo muri Repubulika iharanira Demokarasi ya Congo.  Muri iyo gahunda ya Tugendere hamwe , paruwasi ya Gikondo yari yiyemeje kugirana umubano n’izo paruwasi eshanu  zose, kahaba harihasigaye Paruwasi2 gusa , paruwasi ya Kabuga na paruwasi ya Rutshuru.

 

 

Igitambo cya Misa cyatuwe na Padiri Mukuru Jean Baprtiste uyobora paruwasi ya Kabuga afatanyije na mugenzi , Padiri Jean Marie Vianney Nizeyimana, Vicaire wa paruwasi Gikondo.
Korari “Ste Famille” ya Paruwasi Gikondo ni yo yaririmbye misa y’uwo munsi. N’ubwo umuriro wabatengushye ntibabone uko bakoresha inanga bari bajyanye, ntibyabujije gufasha abakristu gusenga neza kandi basusurutse
Padiri Vicaire wa Paruwasi Gikondo, niwe wavuze ijambo ritangiza ku mugaragaro Umubano hagati ya paruwasi zombi
Perezida w’Inama Nkuru ya Pawuwasi Kabuga ashimira abakristu ba paruwasi ya Gikondo kubera umubano baje gusaba

Guhera rero ku cyumweru tariki ya 06/05/2018,  Paruwasi ya Gikondo na Paruwasi ya Kabuga zikaba zarinjiye mu mubano udasanzwe uhuza abakristu ba zo. N’ubusanzwe zari zifitanye isano yo kuba zose ari paruwasi za BENE PALLOTTI, ariko noneho kuva ubu zifitanye umubano wihariye, wa wundi utuma abakristu b’izi paruwasi basabana ku buryo bwihariye kandi mu byiciro byose .

Imihango yabimburiwe n’igitambo cya misa cyatuwe na Padiri Jean Baptiste Mvukiyehe, Padiri   Mukuru wa paruwasi ya Kabuga,  afatanyije na Padiri Jean Marie Vianney  Nizeyimana, Vicaire wa padiri Mukuru w’I Gikondo. Korari yasusurukije abakristu ni Chorale Ste famille ya Gikondo. Igitambo cya misa kimaze guhumuza, Padiri Mukuru Jean Baptiste yahaye ikaze abakristu baturutse i Gikondo, nyuma Perezida w’Inama Nkuru ya Paruwasi ya Kabuga  nawe yakira abashyitsi bose mu izina ry’abakristu bose anashyikiriza mugenzi we Visi Perezida w’Inama y’Ikenurabushyo ya Paruwasi Gikondo, Bwana Murenzi Vincent, impano y’uruhisho, abakristu ba Kabuga bari bageneye abakristu ba Gikondo.

Perezida w’Inama Nkuru ya paruwasi ya Kabuga yasoje ijambo ritanga ikaze atanga impano abakristu ba Paruwasi ye bageneye abakristu ba paruwasi ya Gikondo. Aha Visi Perezida w’Inama ya Paruwasi y’Ikenurabushyo ya Gikondo, bwana Murenzi Vincent , arakira iyo impano ashyikirije n’ umwe mu bagize komisiyo ya Jumelage, Sr Brigitte .

Mu ijambo rigufi Bwana Murenzi yavugiye aho mu Kiliziya  yishimiye nawe umubano utangijwe hagati ya paruwasi zombi,  avuga ko “ umuntu udafite urukundo aba yarapfuye ahagaze”. Yabigavuze yifashishije aka gatekerezo, agira ati:” Umubyeyi yari afite abana babiri.  Umwana umwe akaba yararangwaga n’urukundo undi nta rukundo namba yagiraga. Umubyeyi agiye gupfa, ahamagara abana be bombi abasezereho. Abwira umwe  warangwaga n’urukundo ati: ”Mwana wanjye wirirweee!”. Ageze kuri wa wundi utagiraga urukundo, aramubwira, ati:” mwana wanjye urabeho!” Umwana utararangwaga n’urukundo biramutangaza niko kubaza se impamvu amusezeyeho amubwira ngo “ urabeho”, n’aho umuvandimwe we akamusezeraho amubwira ngo” wirirwe”. Mu kumusobanurira yaramubwiye ati:” Namubwiye ngo” wirirwe” kuko we tuzongera guhurira mu Ijuru, kuko yaranzwe n’urukundo, naho wowe nagusezeyeho nkubwira ngo “ urabeho” kuko tutazongera kubonana ukundi , kuko mu ijuru hatajya abatagira urukundo.” 

Umuhanga yaravuze ngo ” iyo ngiye njyenyine ngenda vuba, ariko twajyana tukagera kure
Bwana MURENZI Vincent n’ umuyobozi wa komisiyo y’umubano muri paruwasi ya Gikondo, Mme Leonille MUKANKUSI, barasa n’abaganira kuri gahunda yari igiye gukurikiraho nyuma ya misa.

 

Abahagarariye komisiyo ya Jumelage basobanurira abashyitsi babo ibyiza paruwasi kabuga ifite
Ishusho ya Yezu asenga mu murima wa getsimani, iri mu “Jardin y’Imiryango y’Agisiyo Gatolika”,uyibona ukigera mu muryango wa Kiliziya y’Ingoro y”Impuhwe z’Imana aho i Kabuga
Aha ni ahazubakwa Chapelle yibutsa amateka ya paruwasi ya Kabuga kuko ariho Kiliziya ya mbere yari yubatse.

Nyumba y’igitambo cya Misa, uhagarariye Komisiyo ya Jumelage muri paruwasi ya Kabuga, yatambagije abashyitsi be paruwasi baje gusura,  uwo mutambagiro wasorejwe mu gikari cy’urugo rw’abapadiri, aho bakomereje ibiganiro n’ubusabane.  Mu biganiro binyuranye impande zombi zagiranye, paruwasi yagikondo yanyuzwe na gahunda y'”Ibiganza 1000″ Padiri Mukuru Jean Baptite yatangije aho i Kabuga mu rwego rwo gushishikariza abakristu  kwanga gukomeza kuba ba ntibindeba, ahubwo bakinjira mu butumwa  bwa Paruwasi. Buri mukristu winjiye muri iyi gahunda y’Ibiganza 1000″ akaba agomba kubera  abandi umusemburo wo kwihatira gusenga, kubaka umuryango w’Imana  ariwo Kiliziya, Gufatanya n’abandi no gucengera ukwemera.

Padiri Mukuru Jean Baptiste yakira abashyitsi mu busitani ahari hateguwe gukomereza ibiganiro.
Padiri Bienvenue, wigeze kuba padiri Vicaire muri paruwasi yacu  ya Gikondo, asuhuzanya na Bwana Kalinijabo Diogene, perezida wa Santarari Mutagatifu Visenti Pallotti, ari nayo Santarari y’inyarurembo ya paruwasi Gikondo
Nyuma yo gutambizwa ibyiza Kaguga ifite, abahagarariye abakristu ba paruwasi zombi bakomereje ibiganiro mu busitani buri mu gikari cy’inzu y’abapadiri
Padiri Mukuru Jean Baptiste yasobanuriye abakristu ba Paruwasi Gikondo ibyerekeye gahunda ” y’IBIGANZA 1000“

Uruzinduko rwasojwe paruwasi ya Gikondo itumiye paruwasi ya Kabuga kuzaza kuyisura nayo ,paruwasi ya kabuga ikaba yarabyemeye;  itariki n’igihe urwo ruzinduko ruzabera ikazamenyeshwa komisiyo y’umubano.

Muri gahunda ya tugendere hamweihuje paruwasi, Gikondo, Kabuga, Ruhango, Kinoni, Rutshuru na Karhale, abagize Inama z’Ikenurabushyo muri izo paruwasi uko ari esheshatu, bafite Komite ihuza abalayiki iyobowe na Bwana NZABONITEGEKA Noel usanzwe shinzwe umutungo na Liturujiya muri paruwasi ya Gikondo.
Mbere yo gusoza uruzinduko rwabo muri paruwasi ya kabuga, abakristu b’impande zombi bifotoje agafoto k’urwibutso bose bari hamwe

Habumukiza Joseph

Komisiyo y’itangazamakuru