GIKONDO MU “RUGENDO RUTAGATIFU” RWO KWAGURA KILIZIYA YAYO

Paroisse Gikondo

Sangiza inkuru

Guhera  ejo bundi ku cyumweru   tariki ya 29 Mata 2018, abakristu  ba paruwasi ya Gikondo yitiriwe Mutagatifu Visenti pallotti, hamwe n’inshuti zabo aho ziri  hose ku isi, batangiye “URUGENDO RUTAGATIFU ” rudasanzwe rwo kwagura kiliziya ya Paruwasi yitiriwe Mutagatifu Visenti Pallotti.

Koko rero, kuri icyo  cyumweru cya gatanu cya pasika,  tariki ya 29 Mata 2018, ku mbuga ya paruwasi ya Gikondo,  habereye igitambo cya misa imwe rukumbi, yatangiye saa 10h00.  Iyo misa nk’uko byasobanuwe na Padiri Mukuru Rwasa Chrysante, ikaba yari iyo gutura Imana imirimo  yose  irebana n’igikorwa cyo kwagura kiliziya ya Mutagatifu Visenti Pallotti.  Iki gikorwa Padiri Mukuru yahise abatiza “urugendo rutagatifu”. Nk’uko yakomeje abivuga, hashize imyaka itanu abakristu batekereje  uyu mushinga wo kwagura iyi kiliziya . Kuva icyo gihe kubeza ubu, abapadiri 2  bamubanjirije, barangije ubutumwa muri iyi paruwasi , uyu mushinga utaratangira:  Abo ni Padiri Desire Ruvamwabo na Padiri  Sebutitira Norbert.

Imihango nyirizina yo gutangiza icyo gikorwa  cyari gitegerejwe  cyera, cyari kigizwe n’ibice bitatu bitandukanye ariko byuzuzunya.

Igice cya mbere  cyabaye  igitambo cya Misa ntagatifu:  Cyayobowe na Padiri Mwiseneza Narcisse,  wari uhagarariye Padiri Pronvincial, ukuriye Umuryango w’Abapadiri b’Abapallottini mu Rwanda muri Congo no mu Bubiligi.

Umutambagiro w’abasaseredoti mu ntangiriro ya Mis, bari bitabiriye uyu muhango.

Agashya kagaragaye  muri iki  gice cya mbere,  ni uko, mu gihe cyo gutura,  abakristu bari mu nzego z’ubuyobozi bwa paruwasi, batanze ituro ryabo ukwabo mu rwego rwo kugaragaaza ko nabo bashyigikiye iki gikorwa. Abo bose  bari mu byiciro bitandukanye birimo:  Abagize Biro y’Inama ya paruwasi y’Ikenurabushyo, abagize komite za komisiyo zisanzwe 12 ziri muri paruwasi, abagize komite za komisiyo 3 zidasanzwe zashyizweho kubera iki gikorwa cyo kwagura kiliziya, abagize komite za santarari, abagize komite z’impuzamiryangoremezo, abagize komite z’imiryangoremezo.

Nyuma y’izo nzego z’ubuyobozi bwite bwa paruwasi, hakurikiyeho abarimuri  komite z’imiryango y’agisiyo gatolika yose n’abari muri komite z’amakorari yose akorera kuri paruwasi  haherutse abakristu batari muri izo nzego.

Icyagaragaye ni uko ubu buryo bwo gutanga ituro mu byiciro, bwaratanze umusaruro utari utubutse, kuko ugereranyije n’ituro ryari risanzwe ritangwa buri cyumweru gisanzwe, iry’uwo munsi ryikubye hafi inshuro eshanu, tutabariyemo inkunga zatanzwe nyuma mu gice kizwi ku izina rya ” fundraising”

  • Igice cya kabiri: Cyabaye icyo  gusobanura ibirebana n’imirimo yose yo kwagura kiliziya, agaciro kayo no kumurikira  abakristu igishushanyo kigaragaza  uko kiliziya yabo izaba iteye, igihe izaba yarangije kwagurwa.

Bwana Gasasira Gaspard, ukuriye komisiyo y’ubwubatsi, yasobanuye ko  kiliziya isanzwe yari ifite ubushobozi bwo kwakira abakristu  bagera kuri 870 gusa, ikaba kandi yari igizwe n’igice cya “cave” kirimo bureau ya Padiri mukuru, ubukarani bwa paruwasi,  chapelle  na salle ebyiri ariko ntoya.

Yongeyeho ko mu gihe iyi Kiliziya yubakagwa, “yari Kiliziya nziza, kandi  iboneye ijijsho”. Ariko ngo ikaba itari ijyanye n’ibihe tugezemo.  Aho niyo abakristu bashingiye batekereza ko  batakomeza kuvugurura inyubako zabo no kubaka inshya bazihuza n’igihe, mu gihe Ingoro y’Imana yo  yari itangiye gusigara inyuma.

Biteganyijwe rero ko nyuma yo kwagurwa, iyi kiliziya izaba ifite ubushobozi bwo kwakira abakristu bari hagati ya 2100- na 2190. Ugereranyije   ni hafi inshuro eshatu  z’abo  yakiraga uyu munsi. Izaba igizwe n’ibice bitatu by’ingenzi:

  • Kiliziya nyirizina izaba  ifite buriya bushobozi bwo kwakira abakristu bagera ku nshuro hafi  eshatu z’abo yakira ubu,   izaba kandi ifite chapelle  nshya yiyongera kuri chapelle isanzwe. Iyo chapelle nshya izaba ifite ubushobozi bwo  kwakira nayo  abakristu bari hagati ya 100 na 150. Ku buryo bw’umwihariko iyo chapelle  nshya izafasha gucyemura  burundu ikibazo cya misa,  cyane cyane izihariye, zaburaga uko zisomwa ,  kubera ko misa zisanzwe zabaga zegeranye cyane.  Sibyo gusa, biteganyijwe ko kiliziya ijyashyirwamo intebe zifasha abakristu kwicara badahese  ndetse  ku buryo n’abafite ibibazo by’umugongo bitazongera kugaruka. Mu kubaka kandi iyi kiliziya,  hazitabwa ku kibazo cya “sound proof” ndetse ku kibazo cyo kurinda inkunba n’inkongi.  Agaciro rusange k’imirimo iteganyijwe gukorwa, kangana na miliyoni magana atanu  mirongi irindwi (570.000.000frw), ariko mu gihe twaba dutinze gukora ibikenewe byose, ako gaciro kakaba kazamuka kakagera kuri  miliyari imwe (1.000.000.000frw).
  • Hazaba kandi hari n’igice cyo  hasi kirimo  salle 2: Imwe muri izo  ni salle nshya, izaba ifite ubushobozi bwo kwakira abantu barenga 150; naho salle isanzwe yo, nyuma yo kuvugururwa,  ikazaba ifite ubushobozi bwo kwakira abantu bagera kuri 120.
  • Umubare wa Bureaux nawo uziyongera ku buryo cya kibazo abakristu basanganywe cyo kubura aho  bateranira bakora inama z’imiryango ya gisiyo gatolika, amakorari abura ho yitoreza , cyangwa andi matsinda abakristitu  bitagatifurizamo yaburaga aho ateranira , ibyo byose bizaba gikemuwe.
Ing. GASASIRA Gaspard, asobanurira abakristu ibijyanye n’imirimo irebana no kwagura Kiliziya isanzwe. Ati :” Tuzashyiramo intebe nziza ku buryo nta mukristu uzongera gutaka umugongo”
Kiliziya isanzwe n’ubwo yigeze kugerwaho, ubu isigaye yarabaye nto, ikaba  igomba kwagurwa
Padiri Narcisse  yerekena igishushanyo cya kiliziya nshya , yagize ati:” Mu izina ry’Umuryango w’Abapallottini, mu izina ry’Umukuru wawo mpagarariye hano, ntangaje ku mugaragaro ko dutangije ku mugaragaro imirimo yo kwagura kiliziya ya Paruwasi Gikondo yitiriwe Mutagatifu Visenti Pallotti”

 

Igice cya gatatu: Cyabaye icyo kwakira inkunga zinyuranye abakristu n’abakunzi ba paruwasi biyemeje gutanga muri uru rugendo rwo kwagura kiliziya. Muri iki  gice,  abakristu banyuranye bagaragaje ko bashyigikiye iki gikorwa batanga inkunga  nyinshi kandi   ku buryo bushimishije: Abenshi batanze amafaranga, abandi batanga ibikoresho birimo sima, abandi bemera kuzatanga imibyizi igihe imirimo nyir’izina yo kubaka izaba yatangiye.

Muri rusange abakristu bose bagaragaje ishyaka rikomeye cyane ryo kwiyubakira kiliziyayabo,  ku buryo hari n’abana batatinye  kujya imbere y’imbagay’abakristu, bafata micro, bavuga ko biyemeje kuzatanga amafaranga igihumbi( 1000frw) cyangwa ibihumbi bibiri (2000frw), basobanura ko n’ubwo batayafite bazasaba ababyeyi babo.  Burya kokongo “ntawanga ibyiza uretse ko bitinda”.

Muri rusange rero inkunga yose yatanzwe kuri uwo munsi ikaba ikabakaba miliyoni zigera kuri cumi n’enye( 14.000.000Frw), harimo miliyoni ebyiri n;ibihumbi magana atatu (2.300.000frw) zatanzwe mu gihe cyo gutura. Nyuma y’aho kandi, hari n’abandi bakristu batari baje muri icyo gitambo cya misa, nabo bahise batangariza  ubuyobozi bwa paruwasi ko badashobora gucikanwa  no kubura muri urwo rugendo rutagatifu, bavuga inkunga yabo, muri bo hakaba hari uwemeye kugeza kuri konti ya paruwasi  miliyoni imwe  y’amafaranga y’u Rwanda(1.000.000frw)  bitarenze tariki ya 15 Gicurasi.

Dukomeze rero duhurize hamwe imbaraga zacu , tuvuge rumwe,  maze ubundi twemerere Roho Mutagatifu atuyobore kandi atuyoborere iki gikorwa, kugira ngo ejo tutazavaho dugasobanya, ahubwo dukomeze dusenyere umugozi umwe,  kuko abashyizze hamwe Imana nayo ibasanga.

Twifurije buri wese imigisha muri uru “rugendo rutagatifu” paruwasi yacu itangiye.

Ibyo utu dukoko dushobora kuki twe byatunanira, kandi turi amashami ashamikiye ku Muzabibu Nyawe ario Kristu
Ntabwo turi bacye.
Bagize Komisiyo 3 zidasanzwe zashinzwe imirimo yo kwagura kiliziya: Komiyoy’ubukangurambaga, komisiyo y’umutungo na Komisiyo y’ubwubatsi.

 

HABUMUKIZA JOSEPH

Komisiyo y’Itangazamakuru ya paruwasi